shape

Ամենայն Հայոց Կաթողիկոս

Ն.Ս.Օ.Տ.Տ. Գարեգին Բ
Ն.Ս.Օ.Տ.Տ. Գարեգին Բ

Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսը (ավազանի անունը Կտրիճ) ծնվել է 1951թ., Էջմիածնի շրջանի Ոսկեհատ գյուղում: Նրա ծնորղները Գրիգոր և Խաթուն Ներսիսյաններն էին:

Նախնական կրթությունն ստացել է հայրենի գյուղում: 1965թ. ընդունվել է Մայր Աթոռ Սուրբ Էջմիածնի Գևորգյան հոգևոր ճեմարանը: Գերազանց առաջադիմությամբ ավարտել է ճեմարանը, ապա նշանակվել տեսչի օգնական` միաժամանակ դասավանդելով «Նոր Կտակարան» առարկան: 1970թ. դեկտեմբերի 25-ին` Սուրբ Ստեփանոս Նախասարկավագի տոնի օրը, ձեռնադրվել է սարկավագ: 1972թ. Գերաշնորհ Տ. Տիրան արքեպիսկոպոս Ներսոյանի ձեռամբ, ձեռնադրվել է կուսակրոն քահանա` վերանվանվելով Գարեգին աբեղա:

Այնուհետև, երջանկահիշատակ Վազգեն Ա. Ամենայն Հայոց Կաթողիկոսի բարձր տնօրինությամբ բարձրագույն կրոնական կրթությունն շարունակել է նախ Վիեննայի համալսարանի աստվածաբանական ֆակուլտետում, ապա Բոննի համալսարանում, ինչպես նաև Ռուս ուղղափառ եկեղեցու Սբ. Սերգիոս վանքի եկեղեցական ակադեմիայում:

1980թ. նշանակվել է Արարատյան Հայրապետական թեմի Առաջնորդական փոխանորդի օգնական, 1983թ. ապրիլին` Առաջնորդական փոխանորդ: Նույն տարվա հոկտեմբերին ձեռնադրվել է եպիսկոպոս, իսկ 1992թ. ստացել արքության պատիվ և տիտղոս:

Կաթողիկոսի ընտրության ընթացակարգը 1995 ԵՎ 1999 թվականներին
Կաթողիկոսի ընտրության ընթացակարգը 1995 ԵՎ 1999 թվականներին

Հայ Եկեղեցին դարեր շարունակ գործել է ժողովական կառավարման մոդելով: Թեև վերջնական որոշումները կյանքի են կոչվել հայրապետական տնօրինություններով, սակայն դրանք, ի հարկի, կախված իրենց կարևորությունից, քննարկվել են նաև ժողովական կառույցներում: Հայաստանի անկախացումից հետո մեր Եկեղեցին հնարավորություն ունեցավ ազատ գործելու և վերականգնելու իր կառավարման այն ավանդական կարգն ու ձևը, որը դարեր շարունակ ընդունված և հատուկ է եղել Հայ Եկեղեցուն:

Այսօր Հայ Առաքելական Ս. Եկեղեցու ժողովական բարձրագույն մարմինն Ազգային-եկեղեցական ժողովն է, որը և ընտրում է Հայոց Կաթողիկոսին:

Կաթողիկոսական ընտրություններն անցկացվում են երեք փուլով: Առաջին փուլից հետո մնում են առավելագույն ձայներ ստացած առաջին երեք թեկնածուները, երկրորդ փուլից հետո՝ երեքից երկուսը, իսկ երրորդ քվեարկությամբ որոշվում է Ամենայն Հայոց Կաթողիկոսի անունը: