ԲԱՐԱՂԱՄ, Ս. ԱՆԹԻՄՈՍ ԵՎ ԵՐԱՆՈՍ ՀԱՅՐԱՊԵՏԵՐ

Բարաղամը († 250/1)  ըստ արևելյան Հայսմավուրքների, ապրել է 3-րդ դարում, Անտիոքում և նահատակվել Դեկոս կայսեր ժամանակ, իսկ ըստ արևմտյանների` ապրել է Կեսարիայում Դիոկղետիանոսի ժամանակ և ընդունել նահատակության փառապսակը 304 թ.: Հալածանքների ժամանակ ծերունի Բարաղամը բռնվում և բերվում է հեթանոսական տաճար, որպեսզի կուռքերին զոհ մատուցի: Դատի ժամանակ նրան մոտեցնում են կռապաշտական զոհասեղանին և մեկնված աջ ձեռքի­ վրա դնում եռա­ցող­ ամա­նը`­ խնկով­ հանդերձ:­ Տանջողները հաշվարկում էին, որ տկար ծերունին չի դիմանա և կգցի եռացող խնկամանը խորանի վրա՝ այսպիսով զոհ մատուցելով կուռքին: Սակայն Բարաղամը պահում է խնկամանն այն աստիճան, մինչև նրա ձեռքի մատներն այրվում են, որից հետո նա մահանում է` ընդունելով անապական փառքի պսա­կը:

Անթիմոսը († 302/3) նահատակվել է Դիոկղետիանոսի և Մաքսիմիանոսի ժամանակ Նիկոմիդեայում: Նիկոմիդիա­յի քրիստոնյաներին մեղադրում են կայսերական պալատի հրկիզ­ման­ մեջ, և նրանց դեմ սանձազերծվում­ է դաժան­ հալածանք: Եպիսկոպոսը հոտի խնդրանքով թաքնվում է լեռներում և ամրացնում ու մխիթարում հոգևոր զավակներին ուղերձներով: Նրանցից մեկի հետ բռնվում է նաև Թեոփիլոս սարկավագը: Եպիսկոպոսի գտնվելու վայրը չմատնելու համար նա նահատակվում է: Իմանալով` որտեղ է թաքնված Անթիմոսը, կայսրը նրա հետևից քսան զինվոր է ուղարկում: Անթիմոսը, դիմավորելով զինվորներին լեռներում, հյուրասիրում է նրանց և կամավորաբար հայտնում իրեն: Որպես երախտագիտության նշան՝ զինվորներն ուզում էին բաց թողնել եպիսկոպոսին, իսկ կայսրին` խաբել: Սակայն Անթիմոսը չի համաձայնվում: Ի տես այսպիսի հավատքի՝ ուղարկվածները հավատում են Քրիստոսին ու մկրտվում: Կատարելով եպիսկոպոսի պահանջը` զինվորները տանում են նրան պալատ, որտեղ կայսրը ցույց է տալիս Անթիմոսին մահապատժի առարկաները: Սակայն եպիսկոպոսն ասում է. «Դու չես կարող խաբել­ նրան, ով ինքն­ իսկ ցանկա­նում­ է մեռ­նել Քրիստո­սի­ համար, մահապատիժը վախեցնում է միայն տկար հոգիներին, որոնց համար ժամանակավոր կյանքը թանկ է ամեն ինչից»: Կայսրը հրամայում է գանահարել Անթիմոսին, այնուհետև նրան կապում­ են անի­վից­ և պտտելով­ այրում­ ջահե­րով:­ Բազում տանջանքներից հետո նա գլխատվում է: