Մայր Աթոռ Սուրբ Էջմիածնի «Վաչե և Թամար Մանուկյան» Մատենադարանի 10-ամյակի և Գրադարանավարի օրվա առիթով Մատենադարանի տնօրեն Տեր Արարատ քահանա Պողոսյանը շնորհակալագրով պարգեւատրեց երկարամյա աշխատակից, գլխավոր ֆոնդապահ Աստղիկ Սահակյանին:
Խորհրդանշական էր այս օրը. մեծազնիվ տիկին Սահակյանը ճիշտ 55 տարի առաջ աշխատանքի է ընդունվել գրադարանային ոլորտում՝ աշխատելով ՀՍՍՀ պետական գրադարանում` որպես կրտսեր գրադարանավար: Կես դարից ավելի նա իր համեստ ու նվիրյալ ներդրումն է բերել սկզբում Հայաստանի ազգային գրադարանում, 2000 թ.-ից Մայր Աթոռ Սուրբ Էջմիածնի «Գարեգին Ա» աստվածաբանական-հայագիտական կենտրոնի գրադարանում, ապա հիմնադրման օրվանից մինչ այժմ «Վաչե և Թամար Մանուկյան» Մատենադարանում:
Մատենադարանի տնօրենության ուշադրության կենտրոնում են նաև հարգարժան ընթերցողները:
«Հավատարիմ ընթերցող» անվանակարգին արժանացան Մխիթար սարկավագ Մխիթարյանը և Վոլոդյա սարկավագ Հարությունյանը: Բարեշնորհ սարկավագները Մայր Աթոռ Սուրբ Էջմիածնի «Վաչե և Թամար Մանուկյան» Մատենադարանից տարիներ շարունակ բարեխղճորեն օգտվելու համար պարգևատրվեցին տնօրենի շնորհակալագրով:
Ջերմորեն շնորհավորում ենք պարգևատրվողներին, մաղթում ենք ամենայն բարիք: