Լուրեր
Աշխատանքային այց Սբ. Էջմիածնի Մատենադարան
Հայաստանում ԱՄՆ դեսպանատան տեղեկատվական ռեսուրսների կենտրոնի տնօրեն Ներսես Հայրապետյանն ու ԱՄՆ Միջազգային զարգացման գործակալության աշխատակից Ռասա Քենտն աշխատանքային այց կատարեցին Մայր Աթոռ Սուրբ Էջմիածնի «Վաչե և Թամար Մանուկյան» Մատենադարան։
Հյուրերը շրջեցին Մատենադարանի ցուցասրահներով, ծանոթացան հնատիպ գրքերին, ինչպես նաև ընթերցասրահում առկա գրականությանը, Հայաստանի Հանրապետության և Մայիսյան հերոսամարտերի 100-ամյակին նվիրված ցուցահանդեսների նախապատրաստական աշխատանքներին:
Տիկին Ռասա Քենտին առավել հետաքրքրեց Ոսկանյան Աստվածաշունչը. այն հայերեն առաջին տպագիր Աստվածաշունչն է, տպագրվել է 1666 թ. Ամստերդամի Ս. Սարգիս և Ս. Էջմիածնի տպարանում`արքեպիսկոպոս Ոսկան Երևանցու կողմից:
ԱՄՆ դեսպանատան տեղեկատվական ռեսուրսների կենտրոնի տնօրեն Ներսես Հայրապետյանն էլ նշեց, որ մշտապես պատրաստ են համագործակցության:
Մատենադարանի տնօրինությունն ԱՄՆ Կոնգրեսի գիտական գրադարանին նվիրեց Սբ. Էջմիածնի Հրատարակչական բաժնի տպագրած մի շարք արժեքավոր գրքեր:
ԱՄՆ Կոնգրեսի գիտական գրադարանն ԱՄՆ ազգային գրադարանն է. այն աշխարհի խոշորագույն գրադարաններից է, գտնվում է Վաշինգտոնում, սպասարկում է կառավարական մարմիններին, հետազոտական կենտրոններին, գիտաշխատողներին, մասնավոր, արտադրական ընկերություններին, դպրոցներին։
